تبلیغات
*** ** میانا ادبیاتی *** ** - مطالب ابر تورکجه شعر

133 - قاراچی‌لار گۆنه‌شین جمده‌ینی آپاردیلار ، بهزاد شیخ الاسلامی

نویسنده :امین ناصری
تاریخ:شنبه 30 دی 1396-05:38 ب.ظ

قاراچی‌لار گۆنه‌شین جمده‌ینی آپاردیلار 
دوغمالاشمیش بیر پنجره ایییمسر آچیسیندا 
باییلدی
شاعیرین دوغمامیش کؤرپه‌سی 
سیقارئتین توستوسونده ترک ائتدی کؤکسونو 
چؤکدو گؤزلم دامجی ـ دامجی 
کؤکله‌دیلر بوتالاری یالان یئره 
کؤک سالمادیق 
                   هئچ بیر دنیزه 
آدلاندیق…  
آدالانمادیق 
آدیمی ایسته‌سه‌نیز 
قارغالاردان سوْرون 
قلبیمین آیدین یئرینی آپاردیلار یووالارینا 

بهزاد شیخ الاسلامی

١٥ دی ١٣٩٦



داغ کن - کلوب دات کام
نظرات() 

130 - من اسیر ائللرین آه! شاعری‌یم، حبیب ساهیر

نویسنده :حسین ساعدی
تاریخ:سه شنبه 21 آذر 1396-05:41 ب.ظ

بی‌نهایت بو گؤیون آلتیندا
بیزه بیر قبّه‌ی فیروزه ده یوخ!

یانار افلاک‌ده مین‌لرجه چیراق،
بیزه بیر شمع، بیر آویزه ده یوخ! 

بو قدر اولدوز آراسیندا بیزه
یئددی گؤی‌لرده بیر اولدوز یوخ‌اوموش!

بؤلدولر قوش‌لاری عالم‌ده مگر،
بیزه ده چاتدی او آغلار بایقوش؟!

قووالارکن منی هر گون محنت
قاپیمی دؤیمه‌ده‌دیر هر گئجه غم

هامی آزاده ائلین شاعری وار
من اسیر ائللرین آه! شاعری‌یم

حبیب ساهیر


نوع مطلب : حبیب ساهیر 
دنبالک ها: ائلیمیزین اورک سیزیسی حبیب ساهیردن بیر شعر! 

داغ کن - کلوب دات کام
نظرات() 

128 - سنی بو یول‌لارا نئجه تاپشیریم؟، دومان بختیاری

نویسنده :حسین ساعدی
تاریخ:سه شنبه 21 آذر 1396-01:07 ب.ظ

سنی بو یول‌لارا نئجه تاپشیریم؟!
یول‌لارین اوره‌یی داش اولور هردن
بوراخیر باشیما آیاق‌لاریمی
اودور کو اته‌ییم یاش اولور هردن

سنی بو یول‌لارا نئجه تاپشیریم!
بو یول‌لار یارامی ساغاتمایاجاق
 قانادی قیریلان آغ گؤیرچینی
قیشین یوخوسوندان اویاتمایاجاق

سنی بو یول‌لارا تاپشیرابیلمم 
بو توزلو یول‌لاری آغلایان اولماز
شعریمین دومانلی پنجره‌سینی
یاغیشین آلتیندا باغلایان اولماز

قورخورام گئجه‌نین ناغیل‌لاریندا
بو یول‌لار سنی ده گؤتوروب قاچا
بیر قاری بیر دئوه آداقلی گئده
اوستومه بیر پرده قارانلیق آچا

بو یول‌لار قیش اولوب بو یول‌لار پاییز
بو یول‌لار یارالی بو یول‌لار قابار 
اومود ال‌لریمی اونوتما نازیم
گئدنده اونلاری اؤزونله آپار


"دومان بختیاری"


نوع مطلب : دومان بختیاری 

داغ کن - کلوب دات کام
نظرات() 

126 - گؤزلریندن اویانیرام، دومان بختیاری

نویسنده :حسین ساعدی
تاریخ:چهارشنبه 10 خرداد 1396-11:49 ق.ظ

سحر
گؤزلریندن اویانیرام
دؤرد دووار دیر گؤزلرینین چرچووه‌سی
گونشی یوخو گؤرورم
گئجه‌نی دسته چیچک مزار داشیما ...
شاعیرلره شعر یازیرام
شعرلریم بولودون گؤزلریندن آسیلیر
دؤرد دووار ایچینده
دؤرد بوجاق دونیامدا
قارا گونلریمی سئویرم !!!
قارا گؤزلریندن سویونوب 
قاراباغ‌دا شهید اولورام هر دن
ارک‌ده سؤکولورم 
کریمه‌ده قانداللانیرام ایسارت کؤرپولرینده
گوله - گوله چئگوارا اولورام 
چمران چمران 
چیریک ،
 دؤرد دووار آراسیندا!!
یازیق من ،
گؤز یاشییلا گونئی  اولورام 
گؤز یاشییلا  قوزئی 
سحر
گؤزلریندن اویانیرام
همن دؤرد دوواردیر گؤزلرینین چرچووه‌سی
سانجاقلانمیش سانجاق درگیسینه
تهران بیلیم یوردوندا کادرا چکیلیرم
قویلانیرام یولداشلاریمین اللری ایله -
قیزیل اوزن ده 
اورمو گؤلونده دوزلانیر شعریمین بیرینجی اؤدولو !!!
سن اوزاق داسان 
چوووووخ اوزاقدا دنیز کیمی 
گؤزلرین کیمی
آغیر لحظه‌لری داشیییرام دومانلیغیمدا
یوم گؤزلرینی 
شاعیرلیگیم بیتسین دئییه 

«دومان بختیاری»



نوع مطلب : دومان بختیاری 

داغ کن - کلوب دات کام
نظرات() 

124 - تالانمیش خزل، رضوان حاجی قاسملو

نویسنده :حسین ساعدی
تاریخ:دوشنبه 1 خرداد 1396-01:40 ب.ظ

گئتدین آخشام چاغی سئودامی یئله تاپشیردین
ساچلاریمدا سارالان دردی سئله تاپشیردین

پاییزین چرچووه‌سیندن یولا بارماق قویدون
منی حئیوا قوخولو بیر غزله تاپشیردین

بو دیدرگین دوداغیمدا داریخان آل رنگی
یاغیش آلتیندا تالانمیش خزله تاپشیردین

قوپوزوندان گیلئییم وارسا بونا حاققیم وار
کؤوره‌لن کؤنلومو یورقونجا تئله تاپشیردین

وطنیمدن آییریب اللریمی اوزدونده
قارا قوربتده منی الدن اله تاپشیردین 

سنی قارقیشلامیرام بیر کره بوردان یول سال
جانایین آرزیلارین گوزده گوله تاپشیردین 

"جانای"



داغ کن - کلوب دات کام
نظرات() 

123 - گئدرکن گؤرمه‌دین، مرضیه نعمتی

نویسنده :حسین ساعدی
تاریخ:دوشنبه 1 خرداد 1396-01:32 ب.ظ

گئدرکن گؤرمه‌دین آیاق آلتیندا جالانمیش اوره‌یی


یوخسا اونوتموش اودون سنی سئودیییمی

ائله چیرپدین قاپینی

داها ییغانمادیم کوچه‌لردن 

یئتیم قالمیش گؤزلریمی

شاعیر: مرضیه نعمتی



نوع مطلب : مرضیه نعمتی 

داغ کن - کلوب دات کام
نظرات() 

122 - بو یول ایسارت‌لری، مینا صلواتی زاده

نویسنده :حسین ساعدی
تاریخ:شنبه 30 اردیبهشت 1396-11:31 ق.ظ

بو یول ایسارت‌لری 

سنی تانیتیم وئردی منه 

بو قریبه چیراق‌لار قوجاغیندا

پنجره‌یه تیکیلن گؤز یاش‌لاریم 

ویژیللایان آربالارا بنزه‌ییر

یادیرغاماق‌دادیر

بئینیمده هرنه‌یی

اوزاقلاشدیریر سنی مندن  

هر دنده چکدیکجه 

اوره‌یم اوزولور 

سندن 

بو شهردن 

دویغولو گزیب ایز سالدیغیمیز

یئنی آسفات‌لاردا 

هئی 

بلکه ...

بیر الجه‌یه یویولدوق ایکیمیز ده

مینا صلواتی زاده


نوع مطلب : مینا صلواتی زاده 

داغ کن - کلوب دات کام
نظرات() 

121 - سوکوت سسی، فرهاد کدخدایی

نویسنده :حسین ساعدی
تاریخ:شنبه 30 اردیبهشت 1396-11:27 ق.ظ

« سوکوت سسی » 


بیر گوزگو سوکوتام هاراییم اوجا 
سؤزوم وار دولویام بیرجه قولاق یوخ 
اوزوم قیریشسیزدیر ایچیم قات با قات 
اینجی‌لر یاتاغی هر بیری بیر اوخ

دوشومده آنالار لایلاسی یاتیب 
ایگیدلر نیسگیلی آللاها چاتیب 
اوغول وار آناسین بیر "پوک "ا ساتیب 
اوغول وار عؤمرونده قانماییب آز چوخ 

گؤردویوم دئییلمز سسیمیز داردا 
دار واردیر فرمانی لاپ یاخین یاردا 
ساقین، ساتقین بیلمز شرف ده آر دا
دونیانی ساتسا دا قارنی دئییل توخ 

بیری بیر دویمه ‏ده تانری قازانیر 
بیری ده آجیندان بوینو اوزانیر 
بیری ده وار سسی داردا قووزانیر 
ای شاعیر یولداشیم سوسما هارای دوغ 

گل سپک، یارا دا دوز دا اینجیسین 
بیر گؤزل قوشمادا سؤزده اینجیسین 
اورک ده باغیرسین اوز ده اینجیسین 
یا سوکوتا دالما یا سوکوتو بوغ 

سینمده داغ وارسا اؤزوم تورپاغام 
یوردومون ساچیندا دن دوشن آغام
 بیر گوزگو سوکوتام آجی دوستاغام
 آجیسان سؤزومدن سیندیر یئره سوخ!

فرهاد کدخدائی 



نوع مطلب : فرهاد کدخدایی 

داغ کن - کلوب دات کام
نظرات() 

120 - اونوتمامیشدیم کلمه‌لری، امین ناصری

نویسنده :حسین ساعدی
تاریخ:پنجشنبه 21 اردیبهشت 1396-10:58 ق.ظ

اونوتمامیشدیم کلمه‌لری

ساده‌جه سسیم اونودولوردو شعرلرده...

کار دئییلدی هئچ بیر شعر

من لال‌ایدیم من...

ایچیمده قیشقیریردیم سسسیزلیگیمی...

پانتومیم اویناییردیم دفتریمده!

یازیلمادی شعر سایاغی کئچن گون‌لریم یازیلمادیم....!

اوخونمادی!
اوخونمادیم....!

"امین ناصری"


نوع مطلب : امین ناصری 

داغ کن - کلوب دات کام
نظرات() 

95 - سن منیم اولماسان ائل‌لر گوناه‌کار - حسن نوری دن

نویسنده :حسین ساعدی
تاریخ:سه شنبه 4 اسفند 1394-02:59 ب.ظ


اؤزگورلوک دئیه‌رک باش قالدیرماییب
قبریمیز باشیندا داش قالدیرماییب
گؤزموز اوزوندن یاش قالدیرماییب
 سن منیم اولماسان ائل‌لر گوناه‌کار

سنی کیم تامسینیب، سنی کیم دادیب
سنی کیم اودلاییب، بئله فیرلادیب
یالانچی دویغولار، دیل‌لر آلدادیب
 سن منیم اولماسان دیل‌لر گوناه‌کار

سن اؤزون ناز گلیب، نازدا گئدیرسن
شئعیرده گلیرسن، سازدا گئدیرسن
قیش‌دا خوش گلیب‌سن، یازدا گئدیرسن
 سن منیم اولماسان ایل‌لر گوناه‌کار

داغ‌لاردان تؤکولدوم، لئهیم چیخمادی
آیریلیق ائوینی سئلیم ییخمادی
سئل‌لر خان چوبانا دوغرو آخمادی
 سن منیم اولماسان سئل‌لر گوناه‌کار

تئلینی اوزونده خوش آیرییب‌سان
تئلیندن بیر تله یئر قاییریب‌سان
تئلینده اؤزگه‌نی تورا سالیب‌سان 
 سن منیم اولماسان تئل‌لر گوناه‌کار

سنی بیر گول ایله آداخلایارلار
سونوندا او گولو آیاخلایارلار
گول‌لرکی آدامی ساغ ساخلایارلار
 سن منیم اولماسان گول‌لر گوناه‌کار

اگر اوره‌یینین ویجدانی اولسا
منه بیر یول دئنن ایمکانی اولسا
ائل‌لری آتارام هریانی اولسا
 سن منیم اولماسان ائل‌لر گوناه‌کار

 سؤز: ح.نوری


نوع مطلب : حسن نوری 

داغ کن - کلوب دات کام
نظرات() 




Admin Logo
themebox Logo