تبلیغات
*** ** میانا ادبیاتی *** ** - مطالب دی 1396

133 - قاراچی‌لار گۆنه‌شین جمده‌ینی آپاردیلار ، بهزاد شیخ الاسلامی

نویسنده :امین ناصری
تاریخ:شنبه 30 دی 1396-05:38 ب.ظ

قاراچی‌لار گۆنه‌شین جمده‌ینی آپاردیلار 
دوغمالاشمیش بیر پنجره ایییمسر آچیسیندا 
باییلدی
شاعیرین دوغمامیش کؤرپه‌سی 
سیقارئتین توستوسونده ترک ائتدی کؤکسونو 
چؤکدو گؤزلم دامجی ـ دامجی 
کؤکله‌دیلر بوتالاری یالان یئره 
کؤک سالمادیق 
                   هئچ بیر دنیزه 
آدلاندیق…  
آدالانمادیق 
آدیمی ایسته‌سه‌نیز 
قارغالاردان سوْرون 
قلبیمین آیدین یئرینی آپاردیلار یووالارینا 

بهزاد شیخ الاسلامی

١٥ دی ١٣٩٦



داغ کن - کلوب دات کام
نظرات() 

132 - دؤرد ایل‌دن بیر بئش ایل‌دن بیر، ارشد نظری

نویسنده :حسین ساعدی
تاریخ:یکشنبه 3 دی 1396-01:14 ب.ظ


دیل دانیشیر، گؤز دانیشیر 
قاراداش‌ دا سؤز دانیشیر
یالانچی‌ دا دوز دانیشیر
دؤرد ایل‌دن بیر بئش ایل‌دن بیر
یوْل‌لار آیاغا ایلیشیر
آدام‌لار کال کال یئتیشیر
ایلان‌لار قابیق ده‌ییشیر
دؤرد ایل‌دن بیر بئش ایل‌دن بیر
باشماغی باشا گئییرلر
بولبوله سئرچه دئییرلر
ناهارا قانون یئییرلر
دؤرد ایل‌دن بیر بئش ایل‌دن بیر
یای ایچینده قیش اولارمیش
قانادسیز دا قوش اولارمیش
قیزیل‌ دا گوموش اولارمیش
دؤرد ایلدن بیر بئش ایلدن بیر
دره‌لر داغدان باج آلیر
آلچاق‌لار بیردن اوجالیر
اوشاق به‌لک‌ده قوجالیر 
دؤرد ایل‌دن بیر بئش ایل‌دن بیر

ارشد نظری


نوع مطلب : ارشد نظری 

داغ کن - کلوب دات کام
نظرات() 

131 - نه قدر کئفی واریمیش جریمه تؤکمه‌یین!! - بهزاد زالی

نویسنده :حسین ساعدی
تاریخ:شنبه 2 دی 1396-06:17 ب.ظ

نه قدر کئفی واریمیش جریمه تؤکمه‌یین!!

دونن گئجه آذرین 30-و (چیلله گئجه‌سی ایله موصادیف) گئری قالمیش ماشین جریمه‌لرینین ایکی‌قات اولماسینین باغیشلانماسینا سون فورصت ایدی.
من ده بیر چوخ وطنداش‌لاریمیز کیمی هر ایشی 90-جی دیقه‌یه ساخلاماقدا کم گتیرمه‌رم! اونا گؤره ده 5شنبه صبح یوخودان قالخیب گئدیب ماشینین خلافیسینی آلیب تؤکه‌رم دئیه دوشونوردوم. سحرچاغی پولیس +10-ا گئتدیییمده «هله‌لیک خط‌لر کسیلیب گئدین ساهات 12ده گلین» دئدی‌لر.
نه‌ایسه ساهات 12ده ده خلافی آلماق امکانی اولمادی. ماشین کارتینین شوماره‌سینی آلیب بیر کاغاذدا یازاراق دئدی‌لر گئدین ساهات 4-ه دک حل اولار خلافی‌نیزی چیخاراریق ان‌شاءالله. 
خبرلرده پولیس رئیسی‌نین پولیس+10 دفترلری گئجه ساهات 10-ا دک ایشله‌یه‌جک‌ دئدییینی گؤردوم. (آنجاق مییانادا کی 4دن اویانا قالمامیشدی‌لار)
آغا! نه باشینیزی آغریدیم؛ خلافی آلابیلمه‌دیک کی آلابیلمه‌دیک!
گلدیم دوشدوم تئلئگرام‌دا بیر روباتین جانینا، روبات دا دئدی قارداش خط‌لر شولوخدور سامانه‌یه وصل اولابیلمیریک! حتی سونوندا «جریمه‌لرین ائندیریمی اوچون خلافی آلماق ایسته‌ییردینیزسه تئز اقدام ائتمه‌لی‌ایدینیز» دئدی. (احتمالا منظورو گئج آییخمیشسان ایدی!!)
ائس‌ائم‌ائس سامانه‌سی ده جاواب وئرمه‌دی!
موبایلیمداکی بیر أپلیکئیشئنله ده اوغراشیردیم... ساهات 10-ا بیر شئی قالمیردی. آخیر خلافی‌لریمی آلابیلدیم! ائله همن آن اصیل جریمه‌لریمی (یانی ایکی قات اولمامیشینی) همن أپلیکئیشین ایله تؤکدوم.
ائله کئف ائله‌ییردیم کی، جریمه تؤکدویومه...!!
__________
بهزاد زالی




داغ کن - کلوب دات کام
نظرات() 




Admin Logo
themebox Logo