تبلیغات
*** ** میانا ادبیاتی *** ** - 51 - دده قورقود بوی‌لارینا باخیش

51 - دده قورقود بوی‌لارینا باخیش

نویسنده :حسین ساعدی
تاریخ:چهارشنبه 11 شهریور 1394-01:17 ب.ظ

1. دلی دومرول-ه داییر باخیش‌لاریم و سؤال‌لارین

یؤنتم 1: میتولوژیک و ادبی قورولوشچولوق ایله دیسپلین آراسیلیق اولاراق توپلوم بیلیم و چاغداش دونیامیزا گؤره، میللی باخیم‌لار.

2. رَوایتین قورغوسو

 تاریخی باخیم‌دان رئال بیر ائل اولان و باتی تورک‌لرین جدّی اولان اوغوز ائلینده دومرول آدلی بیر کاراکتئر وار. او چوخ گوجلو و جسارتلی‌دیر آنجاق کؤرپو اوستونده دوروب گلیب- گئدن‌دن باج آلماق‌لا حیات سورور؛ اؤزوندن داها گوجلو بیرینی تانیماییر 3. بو غرور و ائتدیکلری ظولوم‌لر اوچون تانری دومرولون جانینی آلماق ایسته‌ییر. اونا، اؤلومون هر کسدن داها گوجلو و قالارغی اولدوغونو بیلدیرمک ایسته‌ییر. عزرائیل دومرولون جانینی آلماغا گلیر آنجاق دومرول اؤلمک ایسته‌میر. بو اوزدن عزرائیل ایله بئله‌جه قرارلاشیر: اؤز یئرینه باشقا بیر آدام تاپسین. عزرائیل اؤلمک اونون یئرینه اؤلمک ایسته‌یه‌نی اؤلدورسون و دومرول‌دان وازکئچسین 4. کیمسه دومرول اوچون جانینی قوربان ائدیب اؤلمک ایسته‌میر. نه آتاسی، نه آناسی، نه... ساده‌جه حیات یولداشی قبول ائدیر دومرولون یئرینه عزرائیله جانینی وئرسین و بو سئوگی سیمگه‌سی نتیجه‌سینده دومرول یئنه ده یاشاسین. بو فداکارلیق قارشیسیندا تانری دومرولو باغیشلاییر

مساله: دومرولون متضاد کاراکتئری باره‌سینده نه دئمک؟ او بیر یان‌دان اوغرودور، کوفورچودور، باشقا یان‌دان ایسه تانری‌نین باغیشلادیغی و سئودییی، هم ده اینسان سئوگی‌سینی قارانمیش بیریسی‌دیر. بو چلیشکنلیک نه دندیر؟

یوزوم‌لاریم:

هرنه‌دن اؤنجه دئمه‌لی‌یم دومرول بیر اَرن‌دیر 5. همده قیرخ دلی‌سی واردیر. اَرن تئرمینی – دده قورقودون اؤزو کیمی- تورک دیلینده ایسلام‌دان اؤنجه تانری سئچکینی اولان شامان، تانری‌یا یئتیشمیش و اوندان بیر گؤیسل باجاریق آلمیش آدام دئمکدیر 6. زامان گئدیشینده عیّار، ایگید، پهلوان و قهرمان کیمی آنلام‌لاری دا قازانیر.7 

بو اوزدن ائتیمولوژیک باخیمیندان دلی و ارن اولدوغو اوچون هم دلی دومرولون 8 حئکایه‌سینده بو ایکی اؤنملی و بیر بیرینه قارشی گلن قونولاری بیرلشدیرمه‌لی‌ییک، هم ده بو بوی‌دا، راوی‌نین بو کاراکتئرله اورکداشلیغی و اونونلا اوخویوجو آراسیندا سمپاتی یارادیب سئویملی کاراکتئر کیمی اورتایا قویماسی، اونون اَرن سؤزونده کی اولوملو صیفت‌لردن، باج آلماق کیمی منفی صیفت‌لری اوچون، نه دن وئجه آلینمازلیغی یا بوشالدیغینی و یاغی، اوغرو یوخ بیر قهرمان کیمی تانیتدیریلماسینی بیر ادبی- تاریخی مساله اولاراق چؤزمه‌لی‌ییک.

بیر:

منجه، ایلک آشاما دا بیر قونونو گؤزه آلمالی‌ییق: دده قورقودون کاتیبی، فیردوسی کیمی اؤز چاغی‌نین ائپیستئمه‌سی ائتکیسینده اولدوغونو اونوتمامالی‌ییق. دده قورقورد کیتابیندا ایسلام‌دان اؤنجه‌کی تورک اوغوزلارین اون ایکی حئکایه‌سی سؤیله‌نیلیر. آنجاق کیتابتین ایسلام‌دان سونرا اولدوغو اوچون، ایسلامین قایدالارینجا دا مجبورلوق اوزره اویغونلاشیلماسی گره‌کیرمیش. 9

دلی دومرولون حئکایه سینده یوخاری‌داکی چلیشکن 11 قونولاری چؤزمک اوچون ادبی- میتولوژیک بیر گله‌نک‌دن 11 سؤز آچا بیله‌ریک: پیس کاراکتئر، حئکایه سیراسیندا عیبرت آلیب، تنبیه اولونوب یاخشی آدام اولور! بو ناغیل‌لارین بیر موتیو حالینا گلمیش اؤزللییی‌دیر.12

 بئله لیکله ائستاتیک و روایت‌شوناسلیق اساسیندا: دومرول پیس‌دن یاخشی‌یا چئوریلمه یولو ایله، بیر عادی اوغرودان گلیشیب اَرن اولور! اؤلومو – سیدارته بودا کیمی- تانیییر و تانری‌نین هامی‌دان داها گوجلو اولدوغو معرفته چاتیر و بو معرفت‌دن اؤترو هم تانری آدامی اولور هم ده عیّار: قیرخ سایی‌سی ایله تورک کولتورونده دئییل، بلکه بوتون کولتورلرده سیمبولیک بیر عدددیر. اَرنلرین سایی‌سی ایسلام عیرفانیندا( قوطب آدلاناراق) قیرخ‌دیر. هر زامان‌دا قیرخ اَرن( اقطاب) واردیر. همن ارلرین برکتینه خاطیر تانری دونیانی داغیتماییر! بئله لیکله اوغرو دومرول اؤلومو تانیماق‌دان اؤترو گلیشیب بیر اَرن یا شامان یا عیّار اولور.

منیم قارشیلاشدیغیم سؤاللارین بیری بودور: بس نه‌دن کاتیب همن اوّلدن بو ارنلیک و دلیلیک صیفتی اونا وئرمیشدیر؟ یعنی هله او معرفته- ساتوری- چاتمادان، ارن اولمادان، نه‌دن اونا ارن دئییر نه‌دن؟

چاغداش حئکایه باخیمیندان کاراکتئرین یاشادیغی حادیثه- اولایین زامان، یئر و دوروم ایچینده اؤزوندن گؤستردییی تپکی‌لر اوچون یارقیلامالی‌ییق! بو اصل کیلاسیک ناغیل‌لاردا رعایتی واجیب گؤرونموش بیر تئکنیک دئییل سانکی! چونکو بعضن رعایت اولونور، بعضن ده اولونماییر! حالبوکی عادی حیات‌دا رعایت اولونماسینا اینانیریق! عادی خالق اوغرو دومرولا ارن دئییرمیش؟! بیر باخیم‌دان باج آلان و ظالیم بیریسی دیر او! منجیلدیر!13 اؤلوم‌دن سونراکی دونیادان قورخدوغو و عزرائیله مغلوب اولدوغو اوچون ده قورخاق‌دیر! باشقالارینی اؤز یئرینه فدا ائله‌ییر! اؤز سهوی، سوچو اوچون یارقیلانیب اؤلمک ایسته‌میر بلکه اؤز جانینی باشقالارین جانیندان شیرین توتوب باشقالارینی اؤزونه قوربان ائتمک ایسته‌ییر! تانری دا بو منجیللییی قبول ائدیر!!

آتا و آنا جان‌لارین وئرمیرلر. چوخ ائشیتمیشیک: قوجالار جان‌لارینی داها چوخ ایسترلر! خانیمی قبول ائدیر دومرولون یئرینه اؤلسون. نییه؟ 

یوزوم‌لاریم: بیر باخیم‌دان: ائل ایچینده دده- ننه دن آلچاق سانیلدیغی اوچون! نئجه کی ایندی ده بو دوشونجه واردیر. باشقاجا، آروادین موخالیفت ائتمک حاققینا مالیک اولمادیغی اوچون!!! یعنی او فداکارلیق ائده‌رک، سانکی اسکی دده شاهلیق- پدرسالاری- کولتورون سیمگه‌سی‌دیر

یوخسا سئوگی اوچون دومرولون خانیمی جانینی اونون یولوندا قوربان وئرمک ایسته‌ییر؟ بو تهر سئوگی، چاغداش دوشونجه سیستئمینده مازوخیسم و منطیقسیز بیر ایش دئییل؟ باشقاجا: اسکی کولتورده مگر سئوگی اوزره ائولنیرمیشلر؟ کؤکلو- سانلی اولان دومرول خانیمی قاچیرمامیش کور اوغلو کیمی؟ بونو بیلمه ییریک. آنجاق سئوگی اوزره ائولندیکلری او زامانین ائپیستئمئولوژیک و سوسیولوژیگ خصیصه‌لریندن دئییل! ائولنمه‌لر احتیاج و یا سیاست اوزره اولورموش اساسن.

بیر باشقا سؤال: دومرولون آتاسی یا قونشولاری قبول ائتسه‌یدی جانینین وئره، تانری یئنه ده باغیشلایاجاقمیش؟ یوخسا عزرائیل اؤزونو قوربانلیق آدامیش 14 آدامین جانینی آلیب اوچوب گئده جکمیش؟ یعنی دومرولون باغیشلانیلماسی، ذاتن قادین جینسی اوچون اولموشدور؟ همن جئندئر: ایلک گوناها بولانمیش جئندئر! بو فداکارلیقلا قادینلیغین سوچو یویولموشدور؟ 

بیلیریک قادین هم ایسلامدان سونرا و هم ایسلامدان اؤنجه بیر چوخ کولتورلرده ایلک گوناهکار، لعنتلنمیش و کیشیدن آلچاق بیر یاراتیقدیر. شیطان( و یا آدمین ایلک خانیمی اولان لیلیث) واسیطه‌سی ایله یاساق یئمیشی( میوه ممنوعه) حوّا یئییر و آدمی ده یئمه‌یه تحریک ائدیر. جنّتدن قووولورلار بو سوچ اوچون.

رئال حیات‌دا ایسه قادین جینسی- سیمون دوبوارین ایکینجی ال جئدندئر (جنس دوّم) کیتابیندا آچیقلادیغی کیمی- نهایت جیسم باخیمیندان و ائکونومیک آچی‌لاریندان کیشی‌یه گؤره ضعیف اولدوغو اوچون کیشی طرفیندن قوللانیلیر و سؤمورگه‌نیلیر؟

سوسیولوژی باخیمیندان اوو- شیکار دؤورونده کؤهول‌لرده قالان قادین‌لار اکینچیلیک تئکنولوژیسینه چاتدیلار! یئنی توپلوم قادین‌لارین جیسمیندن هم توپلومون وراثت ایله داوامی یولوندا ایستفاده ائدیر هم ده تولید یولوندا، آنجاق یئنه آلچاق جئندئر کیمی قادین کیشی‌دن آشاغی توتولور. تورک ائل‌لرینده دوروم بیرآز یاخشی‌دیر: قادین آتا ائوینده نه قدر سیخینتی‌دا یاشاییب آلچاقسانیمسا دا، اَر ائوینه گئدنده بیر او قدر سایغی قازانیر. یعنی آنا شاهلیق( مادر سالاری) دئییه بیلمه‌سک ده، آنا اولوب، حیات یولداشی اولوب صیرف توکه دیجیلیک دوروموندان چیخاراق سایغی قازانیر. ائولنمه‌لرین سئوگی اوزره اولدوغوندان سؤز گئتمیر تاریخیمیزده! آنانین اوجاق صاحیبی اولدوغو، عائیله‌نی- و ائلی- اؤزباشینا ییغیب دولاندیریب ساهمانلاندیردیغیندان سؤز گئدیر آنجاق.

یوخاری‌داکی‌لارا گؤره منجه: قادین باغیشلانیلماییر! ائلین دایاغی اولان خاتین، ائلین داوامی اوچون، اوشاق دوغماق اوچون، باغیشلانیلیر.

کامئرانین باشقا یؤنه چئویریب دومرولا باخاندا نولار؟ دومرول نه دن باغیشلانیلیر؟ اونا نه دن اوغرو اولدوغو زامان‌دا ایسه اَرن و قیرخ دلی‌نین باشی دئییله‌رک اؤیولور؟ دومرول کیمین اوغلودور؟ هانسی ائلین سویونداندیر؟ اونو یوکسک سویلو اولدوغوندان می بو بوتا؟15 یعنی حئکایه‌نین قورغوسونون ضعفی دئییل، ذاتن اسکی دونیانین قوتسالچیلیغی‌دیر! یعنی نئجه شاهلیق اوچون قان و عائیله اؤنملی‌دیر؛ ارنلیک اوچون ده بونجا عیرقچیلیک واردیر! بو تهر اسکی میلّتچیلیک ائلداش‌لاری باشقا ائللرین عضولاریندان اوستون توتور، هم ده ائلین ایچینده اؤزل بیر عائیله‌نی و او عائیله‌دن دوغولان عضولاری ائلداش‌لاردان داها اوستون سانیر. شاهلیق قان‌دا اولمالی‌دیر یعنی! وراثت‌دیر! دلی دومرول ائله بیر عیرقچیلیق‌دان اؤترو باغیشلانیلیر و اَرن سانیلیر همن ایلک مرحله‌دن؟ بو ایسه ائلین صینیف‌لرینی دیکتاتوریزمه معروق قویماییرمی؟ ارنلیک باجاریغی، اوزانلیق یا آشیقلیک باجاریغی چالیشمادان دئییل، تانری طرفیندن وئریلیر! بیر قاباریق و یاخشی، اؤنملی خصیصه اوچون مو یوخسا تانری هر کیمی سئورسه اَرمیش ائدر؟ دلی دومرول‌دا قاباریق و فداکارلیغا لاییق بیر خصیصه وار می؟ نه دیر او؟

باشقاجا: اونون باغیشلانیلماسی ایله هانسی داورانیش تبلیغ اولونور؟ عیّارلیق می؟ وارلی‌دان آلیب کاسیبا وئرمک دوشونجه‌سی می؟ صداقت می؟ فداکارلیق می؟ یوخسا حئکایه بوندان داها اسکی‌لره عاییددیر!؟؟ بو اوزدن داها سیمبولیک باخمالی‌ییق؟

 

ادبی پئسیکولوژیگ تنقیدین تمل داشینی قویان فروید-ون و اؤیرنجیسی و اؤزونه مخصوص بیر پئسیکولوژیگ -و ادبی تنقید آخیمی- اولوشدوران یونگ-ون سیمبولچولوغونا گؤره کؤرپو، عمومیتله یومرو اولان هر بیر شئی- قادینلیق سیمبولودور( باخ: یونگ:صفحه200- 202).16 دلی دومرول قادینلیغین بادیگاردی، ائلین ساخلاییجیسی و قورتاریجیسی، یولوندا اطاعته قاریشمیش سئوگی ایله جان وئرمه لی اولدوغوموز بیر سیمبولیک تیپ‌دیرمی؟ بیر آرکی تایپ‌دیر یعنی؟

ائله ایسه دلی دومرول اوسطوره سی کوراوغلو کیمی رومانسلارین کؤکو اولاراق باشقا بویلارا گؤره داها اسکی بیر روایتدیر؛ همده شامان- شاه کیمی گلنکسل اینانجلارین میتولوژیک کؤکو

اوتوز ایل بوندان اؤنجه یه قدر اینانیلیرمیش: الملک و الدّین تؤامان- دین ایله حؤکومت ائتمک حاققی اَکیز تایلار کیمی بیرلیکده اولمالیدیرلار! بو اینانج صفویه دن سونرا گلمیشدیر منجه. صفویّه حؤکومتی هم دین باخیمیندان هم ده حاکیمیّت باخیمیندان داها اسکیلرده شامان- شاه ایکیلیی ایله تماملانان سیستئمه سون قویوب دین قونولارینی ایسه اؤز ایختیارلارینا آلدیلار.17 یعنی اَرنلیک و ارن سؤزونون هر ایکی آنلامینی دا بیرلشدیردیلر: بیر یاندان دونیا ایشینه یئتیشدیلر؛ اوبیری یاندان ایسه گؤی و دین ایشلرینه. هم جیسم باخیمیندان عیّارلار کیمی گوجلو، هم ده ذهن و فیطرت باخیمیندان شامانلار کیمی بوتا آلمیش، باجاریقلی و گوجلو!!! دده قورقود بویلاریندا هله شامان/ اوزان ایله حاکیم/ خان بیرلیکده امکداشلیق ائده رک ائلی ایداره ائدیرمیشلر: فورموللاشدیرماق ایسترسک دئمه لی ییک، حاکیم ایدئولوژی، اوزان ایسه هئژئمونی- دبلر- اورقانلارینین مالیکی اولاراق، خان جیسم، ائلی قیلینج ایله دوشماندان قورویان اُرن و اوزان ایسه ائلین کولتورونو قورویوب دبلرینی ساخلاییب پئسیکولوژیک- روحی کیمی روللاری وار ایمیش. بو هم تاریخ، هم ده تاریخ اؤنجه سی دؤنملره عایید اولا بیلر.

آنجاق داها اسکیلره گئدنده دومرولون بیر آرکی تایپ18 اولدوغو، ائلین داها چوخ غریزه ایله، یئنیجه اوست بیلینجه- خود اگاهی یه- چاتماقدا اولان و توپلومون تمللرینی تشکّول ائدن واختینی دا گؤزه آلمالی ییق. بو آندا دومرول ائلین ساخلاییجی خصیصه سی، اؤلومه و دوشمنه- عزرائیل- قارشی دورماقلا ائلین وارلیغینی دوغوران بیر ارن گؤرورم! دده قورقود- ون باشقا اوزو! گنجلیی! کیشیلیک غریزه سی و آرکی تایپی

قادینلیغی ییرتیب بَکارتی کنارا ووروب یئنی- بدیع!- بیر یاراتیق یاراتماق فیکرینده اولانلارا بو فیکری گئرچکلشدیرمک- ایرمک- اوچون ایذنی لازیم اولان بیر کاریزما یا باش عضو! دومرولون سئوگی سیمگه سی اولان قادینلیغا قاریشماسی، اونون اوزان- آشیق اولدوغونو دا تصویر ائدیب کور اوغلونون ایلک اؤرنه یی کیمی دوشونمه یه ایمکان وئریر. داها اسکیلرده شاه- شامان عئینی آدام ایمیش! بو اوزدن ائلین تانریسی کوفور ائدیب اوغورلوق ائدن دومرولو باغیشلایا بیلر! او آرکی تایپدیرسا، ائلی اؤلومدن قورتارماق اوچون و دوغورقانلیغی گئری گتیرمک اوچون قادینی اورتایا قویور. بیر آنا اولاراق! یوخسا باجیسی یا بیر قیز فداکارلیق ائتمه ییر! بلکه آتا ائویندن کؤچموش بیر خاتین فداکارلیق ائدیب اؤلومو ایله او کؤرپونو- قادینلیغی، دلی دومرول ایله بیرلیکده- یاشاتدیرماق ایسته ییر....

 

سون سؤز:

باخیش آچیلاریم- ابعادیم- چوخ اولسا دا، بو حئکایه نی دوشونمه یه چالیشدیم. گونوموزده کی ناسیونالیزم، فئمئنیزم، دبلر، ائل و کیملیک سورونو و... بو کیمی حیاتدا اولان قونولاری ایچرله ین بو اوسطوره نی یارقیلاماق اوچون لازیم بیلدییم معلوماتی اورتایا قویدوم. یارقیلاماق، یارقیل‌اری سئچمک و یئنیجه دوشونمک همیشه‌سی کیمی سیزدن اولسون....


یازار: بولود مرادی

 

آچیقلامالار:

1. یؤن- جهت-+ آد قاییران پسوند: یؤنتم: روش، مئتود
2. قورماق- دان فاعیل آدی: قور+ فاعیللیک صیفتی‌نین پسوندی غو: قورغو: قورولموشف دیزاین اولونموش، طرح- پلات-؛ حئکایه نین منطیق و دلیله گؤره روایتی: او ایشین نتیجه سینه فیلان حادیثه باش وئردی و فلانکس فلان شئی اولان فلان ایشی گؤردو و...
3. بو باخیم‌دان سومئر میتولوژیسینده بیل قامیل/ هرنه یی بیلن آدام/ یا گیل گمیش-ه بنزه ییر! او ایسه تایسیزلیقدان و غروردان اؤترو اونا تای و اونونلا گورشه بیلن کاراکتئر اولان ائنکیدونون یارانیلیشینا سبب اولدو/
4- بو باخیمدان دا ائله بیل قامیسدا ائنکیدونون اؤلولر دونیاسیندان سس سویّه سینده قورتولماغی ور بوندان داها اؤنملیسی، اؤلومو سئچمه باجاریغینا مالیک اولدوغونو خاطیرلادیر. تانری هر ایکیسینده ده سئچیم حاققی وئریر!/
5- ایرمک- دن: چاتمیش، یئتیشمیش: روحی بولوغا چاتان، وارسته، پیر موراد. ائتیمولوژیگجه: ایرمک: گئرچکلشمک، اولغونلاشماق: ایرَ/اَرَن: گئرچکلشمیش، گلیشمیش، یئتیشکین کیمسه لر( باخ: ص 237
TÜTK DİLİNİN ETİMOLPJİ SÖZLÜYÜ. İSMET ZEKİ EYUBOĞLU.SOSYAL YAYINLARI.2004) پیر، وارسته، سیرّا یئتیمیش موراد، قوطب/

- köR OĞLU2003. Ankara beyatlı. fuzuli:2003:92-الی 200 -94 خصوصیله آلیتنجی بؤلومو89-91 و اوندان علاوه مثنوی معنوی- دن توت رسالات قشیریه، کشف المحجوب و... عیّارلیق باره سینده ایسه همن کیتابدان علاوه دوکتور شفیعی کدکنی-ین قلندریّه کیتابینا.//

7- بو باخیمدان کور اوغلو، رابین هود و سمک عیّار کیمی اورتا عصیرده چوخ بنزرلی بیر تیپدیر. آنجاق حئکایه اورایا چاتماییر. دومرولون ضعیفلره یاردیم ائتدیی بیر او قدر قاباریلماییر بو بویدا. آنجاق رنگی- قوخوسو وار.//
8- دلی گئری ذکالی- عقب افتاده- دئییل؛ چوخ قورخماز و دیوانه سر کیمی معنالاردادیر./
9. فیردوسی ده گؤروروک میترائیست، زروانیست یا زردوشتلی اولان کاراکتئرلر، ائولنمه دن اؤنجه عاقید گتیرمه لی دیرلر! حالبوکی بو عقد گلنه یی ایسلامدان سونرا ایران ائللری آراسیندا یایینلانمیشدیر. دده قورقوددا ایسه بو کیمی ائتکیلر چوخدور. مثلا ایچکی ایچمک حلال گؤرونور و یا توتئم حئسابلانان نسنه لر و یاراتیقلار «توسّل» اولونور! بو چاغداش دوشونجه لرین ائتکیسی هم عمد اوزره اولا بیلر هم ده بیلمزلیگدن و بیلینج التی- ناخودآگاهی- بیر ائتکی اولا بیلر.//
10. چلیشکن: کؤک: چالماق/ چلمک+ صیفت قاییران کن پسوندی: اویوم ساخلامایان... متضاد
. ZEKİOĞLU.ص:138//
11- گله‌نک : ایرجاعی حالدا اولاراق، گلیب بیزه چاتمیش دبلر، عنعنعهلر. بو دب‌لرین اساسی میتولوژیک- سیاسی اولسا دا، هئژئمونی قاورامینا داها یاخین اولان بیر معنادا بعضن توپلومو ائتکیلندیریرلر.


12. ( باخ: پوپون ریخت شناسی قصه های پریان کیتابینا. اوردا روس ناغیللارینا اساسلاناراق عمومیتله اسکی ناغیللارا بیر تکرار اولونان و ده ییشمز قورولوش مودئلی اورتایا قویور. بو مودئلین بیریسی ده تئراژیلرده داها چوخ گؤزه چارپدیغی کیمی کاراکتئرین سهولریندن عیبرت آلیب احتیشام قازانماسیدیر. دیققتیزی چکمک ایستیرم کی عموما سهولر بیلرکدن اولمور! مثل روستم ایله سهراب تئراژئدیسینده. یا تپه گؤزده. دلی دومرولدا ایسه سهو خبیثلیک اوزره دئییل بو اوزدن! بلکه غروردان کئفلنیب اینسانین ارسطو دئدیی روح آرینماسینا مانع اولان خصیصه لریدیر.
13- من+ ماراق یا سئویم گؤسترن پسوند: منجیل: اؤزونو چوخ سئویب به یه ن، خودخواه| قانجیل کیمی: قان چوخ سئون، قان اَمر|. بیر نوکته: اسکی تراژئدیلرده قهرمانین اساس ضعف پئسیکولوژیک خصیصه سی همن غرور اولور! منجیللیک و آشیری اؤتکم- تکبر- قهرمانی دیکتاتورییه و سهو ایشلره چکیر نهایت ده ایسه فاجعه باش وئریر.بو حئکایه ده آنجاق منجیللیک بیر اوداقلاییجی- کانونی گر- عامیل اولسا دا، قاباریلماماقدادیر//
14- داوطلب اولموش، آداماق: آدلاندیرماق= آداقلی- نامزد؛ بورادا داعیش یا انتحاری حمله ائدن اداملاری اؤرنک توتماق اولار. بو آداملار اؤز جانلاریندان کئچیرلر باشقا بیر وارلیق اوچون| و منجه باشقا بیر قاورام اوچون!!!| عیرفاندا بئله فداکارلیق، سئویلیرسه ده عادی حیاتدا سئویلمزدیر یقین.//
15- بوتا: تانری وئرگیسی. ذئن فلسفه سینده ساتوری مرحله سینه چاتیب بیر کَرامته الله طرفیندن مالیک اولماق کیمی اوزانلارا، آشیقلارا، ارنلره عایید بیر سویو یوکسکلیک.//
16- باخ فرویدون تعبیر رؤیاها کیتابینا و البته: انسان و سمبولهایش، دکتر کارل گوستاو یونگ، با همکاری ماری لویزفون فرانتس و ...دیگران، ترجمه محمود سلطانیه،- تهران: جامی، 1377. خصوصیله ایکینجی، اوچونجو و بئشینجی فصیللری
.

17. طبیعی کی بو سلسله دن اؤنجه ده شاهلار دین ایشلرینه یئتیشیرمیشلر آنجاق خلیفه و خلافت قاورامینین هله عوثمانلیلار الینده اولمادیغی، شیعه دئییل سنّیچیلیک مذهبینده اولدوقلاری و.... فرقلندیریجی عونصورلاردیر.//
18- آرکی تایپ تئرمینین بئله جه تعریفله یه بیلرم: اینسانلارین بیلینج آلتی- ناخود اگاه- سرحدلرینده غریزه کیمی محرکه لرین بوتونلوکله تمثالی، مثلا منجیللیگ غریزه نین آرکی تایپی - دیکتاتوریسم قاورامی یعنی- دئدیکده بیغ، جیناقلی و حیرصلی- پورسلو، دهشتلی- بیر کیشی!!!- یوخسا چوخ اینجه جیک و گؤزل- بیر قادین!!- خاطیرلامیرسینیز؟ طبیعی کی فرویدا گؤره بیزیم بیلینج آلتیمیز بیزیمله شعر دیلینجه- مئتافوریک- دانیشار. رؤیالاردا، دیلده سؤز قاچیرمالاری- تپق زبانی- و... باشقا دوروملاردا اختیاریمیزدا اولمایان آنجاق ایستکلریمیزی معیّنلشدیرن بو بؤلوم، یوخولاردا- شعر کیمی- صریح دانیشماز؛ واسیطه لی دانیشار. او واسیطه لرین داها عمومی بیچیمینه یونگ آرکی تایپ دئدی منجه یانلیز! مثلا: آغ ساققاللی بیر آدام بوتون اینسانلارجا بیلیم، حیکمت و عاغیل کیمی شئیلرین عمومی میثالی- کهن الگوسو-دور. بو اسکی اولگولر اینسانلارین بیرلیکده یاشادیغی زامانلاردان بیلمزلیکدن قالمیشدیر؛ ژئنتیک خصیصه لری کیمی. بو خصیصه لر دلی دومرولدا ایسه واریمیش
!

 




داغ کن - کلوب دات کام
باخیش‌لار() 
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر
نظرات پس از تایید نشان داده خواهند شد.




Admin Logo
themebox Logo